Saturday, June 26, 2010

බබාගෙ කෝච්චිය... :D

මේ කතාව මම ගිය සතියෙ ඇත්තට දැකපු සිදුවීමක්... මේක වුනේ මමයි, මගේ ආදරණීය සොයුරිය හෙවත් ජබොස් සීනියර් එක්ක හිම කිරම කන්න ගිහින්... 





ඔන්න ඉතින් අපි හිම කිරම ගන්න හිතාගෙන කවුන්ටර් එකේ පොලිමේ ඉන්නවා... ඔතන එහා පැත්තෙ තියෙනවා පොඩි එවුන්ට සෙල්ලම් කරන්න සෙල්ලම් කෝච්චි, වාහන අනම් මනම් ගොඩක්... ඒවා හරිම ලස්සනයි, දක්කම ආස හිතෙනවා... ඔන්න එක කෝච්චියක නැගලා ඒක පැද පැද හිටියා හරිම ස්වීට් චුටි බබෙක්... සෙන්ටි මීටර් 10ක් විතර දිග චුචි කොට කලිසමකුත් ඇඳගෙන සුදුම සුදු චීස් බෝලයක් වගේ... එයාගෙ අම්මයි තාත්තයිත් හිටියා ළඟම ලොකු කතාවක් දාගෙන... බොහොම තරුණ ලස්සන කපල් එකක්... (ඒක වෙන්න ඇති බබා ඔච්චර ලස්සන වුනේ!)

ඔන්න ටිකකින් අර බබා කෝච්චියෙන් බැහැලා ආව අම්මයි, තාත්තයි ගාවට... ඇවිත් කිව්වා, "අම්මි, අපි අලක ගෙදල ගෙලියමූ..." අම්මා ඇස් දෙක ලොකු කරලා කෝච්චිය දිහා බලලා කිව්වා "අනේ පැටියෝ ඒක මහ ලොකු මැෂින් එකක් නේ..., ඒව විකුණන්නෙ නෑ..." කියලා... පොඩි එකාට මාර අප්සට්... ආයෙම ගිහින් කෝච්චියට නැග්ගා... තව ටිකක් පැදලා ආයෙම ආව මූණ නරක් කරගෙන... "තාත්තී, අලේ අපි අලක ගෙදල ගෙලියමුකෝ..." දැන් මිනිහා අඬන්න ඔන්න මෙන්න... අම්මා ආයෙම අරක කියන්න කට හැදුව විතරයි තාත්තා අම්මව නැවැත්තුවා... 

සාක්කුවෙන් පර්ස් එක ඇදලා ගත්තා... පොඩි එකාගෙ හුරතල් කතාව නිසා මෙයාල දිහා හැමෝම බලාගෙන හිටියෙ... හැමෝම බයවෙලා වගේ බැලුවා තාත්තා පර්ස් එක ගන්නකොට... ඊට පස්සෙ ඒකෙන් ඇදල ගත්තා රුපියල් 20 කොලයක්... දීල බබාට කිව්වා "චුටි පුතා, ඔන්න තාත්ති සල්ලි දුන්නා, අර කවුන්ටර් එකේ ඉන්න ආන්ටිට සල්ලි දීලා ඕක ගන්න" කියලා... පොඩි එකාට මාර සතුටුයි... ලොකු හිනාවකුත් දාගෙන කවුන්ටර් එකට ගියා... තාත්තටත් හිනා... ගිහින් අමාරුවෙන් ඉස්සිලා වටේ පිටේ අයගෙත් උදව්වෙන් අමාරුවෙන් කවුන්ටර් එකෙ එල්ලිලා අර රුපියල් 20 දික් කරලා "ආන්ටී, මට අලක දෙන්න..." කියලා අර දඩාර සයිස් කෝච්චිය ඉල්ලුවා... 


    ඒ ගෑණු ළමයා මුලින් බය වුණා, වැඩේ තේරුනාම හිනා ගියා... එයා බබාට කිව්වා... "පැටියෝ... ඕක ලොකු වැඩියිනේ... ගෙනියනකොට කැඩෙනවා... තාත්තිට කියලා වෙන කඩේකින් පොඩි එකක් ගන්න....."     පොඩි එකාට අලුත් ප්‍රශ්නයක්... දුවගෙන ගිහින් තාත්තට රිපොර්ට් කලා "තාත්තී, අල ආන්ටි කියලවා මේක කැඩෙලවා කියලා තූති එකක් ගල්ලලූ..." තාත්තත් කිව්වා "ඔව් පැටියො, මේ පරණ එකක් නේ... අපි වෙන තැනකින් අලුත් එකක් ගමු..." කියලා... පොඩි එකාට මාර සැටිස්... පැත්තකින් වාඩි වෙලා අම්මගෙ අයිස් ක්‍රීම් එකට වැඩේ දෙන්න පටන් ගත්තා...

තාත්තා හිනා වෙලා වටේ හිටපු අයට කිව්වා "තාම ගොඩක් පුංචියි නෙ... මෙතනින් එලියට බැස්සම එයාට කෝච්චියක් තිබ්බද කියලවත් මතක නෑ.." කියලා... ටිකකින් තුන් දෙනාම කාල බීල ගියා... ටිකක් වෙලා යනකන් හැමෝම කතා වුනේ ඒ තාත්තගෙ නුවණ ගැන... ඒ වෙලාවෙ එයත් කෑ ගැහුවනම් පොඩි එකාට ඕක ගන්න බෑ කියලා, පොඩි එකාට තාත්තයි අම්මයි එක්කත් තරහ යනවා, මූඩ් එකත් අප්සට් යනවා... ඒ වෙනුවට ඒක ගන්න බෑ කියන එක එයාටම තේරුම් ගන්න ඉඩ සළස්වපු එකත්, අම්මයි තාත්තයි එක අරන් දෙන්න ට්‍රයි කරත් ඕන හැම දේම ගන්න බෑ කියන එකත් එයාටම තෙරුම් ගන්න සළස්වපු එක බොහොම වටිනවා... මෙ පුන්චි වයසට ඕක නොතේරුණත් ටික ටික ලොකු වෙද්දි එයාගෙ මනසට ඕව කා වදියි...

 එක දෙයක් නම් පැහැදිලියි... කවදාහරි දවසක එයා එයාගෙ තාත්ත ගැන ආඩම්බර වෙයි...



හීනෙන් බ්රූම්.......... ;)

ඔන්න ජබොස් නංගි අද පිස්සො ගැන කතාව චුට්ටකට නවත්තලා, හීන ගැන කතාවක් කියන්නයි යන්නෙ... මේක මටම වෙච්ච් අතිශයින්ම සත්‍ය කතාවක්...

හීන දැකීමේ විශාරද කෙනෙක් විඩියට ජබොස් නංගියාව (ඒ කිව්වෙ මාව) හැඳින්නුවත් ලොකු වැරැද්දක් නෑ! මොකද උදේ, දවල්,  රෑ   ඕනෙ වෙලාවක යන්තම් ඇහැ පියවුනොත් හීන වැලක්ම බලලා තමයි ඇහැරෙන්නේ...

සමහරු ඉන්නව ආසාවටවත් රෑට හීන දකින්නෙ නැති... එයාල කියනවා හීන දැක දැක නිදාගත්තම ඒක සම්පූර්ණ නින්දක් නෙවෙයිලු! කොහොම වුනත් ලස්සන හීනයක් බලලා ඇහැරුනාම තියෙන ෆන් එක දන්නෙ බලන කෙනාම තමයි! ලොල්!

අපි ගොඩක් වෙලාවට හීනෙන් දකින්නෙ දවල් තිස්සෙම හිත හිතා ඉන්න දේවල්නෙ... ඒව යටි හිතේ තැන්පත් වුනාම රෑට හීනෙන් පේනවා... මට වෙච්ච මේ වැඩෙත් ඔය වගේ එකක් තමයි...

ඔන්න මමයි, බොස් අය්යයි රියදුරු බලපත්‍රය ගන්න පුහුණුවීම් වලට ගියෙ එකට... (අනාගතේ කවද හරි දවසක දුර ගමන් යනකොට මාරුවෙන් මාරුවට ඩ්‍රයිව් කරන්න දෙන්නටම ඩ්‍රයිවින් පුළුවන් වුනාම ලේසියිනේ!!! හිහ් හිහ්!) ඒ දවස් වල හැමදාම දෙන්නත් එක්ක එකට යනවා... බොස් අය්යාට ඉතින් යන යන තැන යාලුවො පිරෙනවනෙ.. ඒක නිසා එතනත් එකට සෙට් වුනු යාලුවො ටික, අපි පරක්කු වුනත් එක ලඟ සීට් දෙකක් තියල තියනවා... ඒක නිසා ඉතින් ඒ පැය දෙක තුන මාර ෆන්... 

පුහුණුවීම් වලට තමන්ගෙ වාරෙ ආවම රියදුරු අසුනට නැගල ඉගිලෙන්න හදනවා... (ඉක්මනට ආයෙ සුපුරුදු අසුනට සෙට් වෙන්න ඔනෙනෙ) ඕක නිසාම ඒ දවස් වල හරි ප්‍රසිද්ධයි හරිම වේගෙන් ඩ්‍රයිව් කරන දෙන්නෙක් හැටියට... ඒ වුණාට ඔය සෙල්ලම් හරි යන්නෙ නෑනෙ ට්‍රයල් දවසට... එදාට හිමින් ගිහින්, වංගු දාලා, රිවස් කරලා, කචල් ගොඩයි නේ... ඒක නිසා අපි හැමෝටම ගෙදර ඇවිත් පුහුණු වීම් කරන්න කියල වෑන් අය්යා නිතර කිව්වා.. ඔය අතරෙ අපේ ගෙදර වාහනේ පොඩි යාන්ත්‍රික දෝශයක් ඇවිත් මගෙ පුහුණුවීම් චකබ්ලාස් වුණා... අන්තිමේදි අපිට ට්‍රයල් ළං වෙනකොට මට ඉස්සරහට විතරයි යන්න පුලුවන්... පස්සට යන්න බෑ!!! එ කිව්වෙ වංගු වලට රිවස් බෑ!!! දැන් මොකද කරන්නෙ.., රිවස් නැතුව පාස් කරන්නෙත් නෑ... ට්‍රයල් එකට කලින් දවසෙ වෑන් අය්යා කිව්වා, හෙට නම් ඔයාට රිවස් එකක් දුන්නොත් ඔයා ෆේල් වෙනවා කියලා... 




මම ඉතිං එදා ගෙදර ගියේ හොඳටම බය වෙලා... බොස් අය්යා නම් දිගින් දිගටම කිව්වා, බය වෙන්න එපා ඔයා පාස් වෙනවාමයි කියලා... නැතත් ඉතින්, පාස් නම් පාස්, ෆේල් නම් ෆේල්, කොයි දේ වෙන්නෙත් මිනිස්සුන්ටනෙ කිව්වා... මමත් ඉතින් හිත හදා ගත්ත වුනත්, දවසම නන්ස්ටොප් රිවස් එක ගැන කල්පනා කර කර ඉඳලා නිදා ගත්තා පහු වෙනිදා ගැන හරිම දෙගිඩියාවකින්... 

ඔන්න ඉතින් පහුවෙනිදා වාහනේට නැග්ගම මට හම්බුණා පළවෙනි චාන්ස් එක ඩ්‍රයිව් කරන්න.. බොස් අය්යත් හිටියා පිටිපස්සෙ සීට් එකේ වාඩි වෙලා... දැන් ඔන්න මම ගත්තා වාහනේ පාරට... යනවා යනවා... වේගෙන්, හිමින්, හැම විදියටම... ලොකු පිට්ටනියක් වගේ එකකට හැරෙව්වා... යන ගමන් ස්ලෝ කරලා රිවස් කලා.. (හිස් පිට්ටනියේ කොහෙ හැප්පෙන්නද?) තව තව දුර ගියා... පැය ගානක්... ඇති වෙනකන්, හොඳටම පුලුවන් වෙනකන් රිවස් කලා... අන්තිමට මටම තෙරුණා මට දැන් ඕන තැනක බය නැතුව යන්න හොඳටම ඩ්‍රයිවින් පුළුවන් කියලා... දැන් හිතට මාර හයියක් ආව වගේම මාර සතුටුයි මොකද හොඳටම ෂුවර් පාස් වුනා කියලා... වාහනේ හිමීට නවත්තලා බිමට පනිනකොට තමා දඩස් ගාල ගැස්සිලා ඇහැරුනේ... බලනකොට තාම ඇඳ උඩ... වෙලාව 6යි...

මට එකපාරටම මාර ෆිට් ගතියක් දැනුණා... ඒත් එක්කම මතක් වුණා රෑ නිදාගත්තෙ මොකක් හරි අප්සට් එකකින් කියලා... හිමින් සැරේ හිතලා බලනකොට තමයි මතක් වුනේ මගෙ රිවස් ප්‍රොබ්ලම් එක... ඒත් එක්කම මට දැනුණා දැන් හොඳට රිවස් පුළුවන්නෙ කියලා.. මොකද රැයක් එළි වෙනකන්ම රිවස් කලාම උදේ වෙනකොට ඕක බැරි වෙනවද?

ඉතිං ඔන්න එදා ට්‍රයල් එක අධි සාර්ථක වුණා... රිවස් කරද්දි පුරුද්දට වගේ හිත පොඩ්ඩක් අවුල් ගියත් ඉස්සරහ කණ්ණාඩියෙන් බොස් අය්යාවයි, වෑන් අය්යාවයි පෙනුණ නිසා වැඩේ ෂේප් වුණා... ගානට කැපිලා ඇති වුණාම මම තව කපන්න කලින් අර දෙන්නම පිටිපස්සෙ ඉඳන් මට ලාවට සිග්නල් එක දුන්නා පරීක්ෂකතුමාට පේන්නෙ නැති වෙන්න... ඔයින් මෙයින් අපි දෙන්නම පාස්...

බලන්න ඉතින් හීන වලින් කොච්චර ප්‍රයෝජන තියනවද කියල අපිට... හිහි හී...

Friday, June 25, 2010

පිස්සංගේ පිස්සු විකාර - 04

ජබොස් නංගියා ඊයේ කතාව "සස්සනට" දාල නොවෑ!

ඔන්න හුදී ජනයාගේ පහන් සංවේගය උදෙසා අදත් බොස්ගෙන් පිස්සු කතාවක්.කතාවක් කිව්ව්ට කලින් කතාවෙම ඉතුරු කොටස හොඳේ!

මේක ගොම්බෙට්ටක්නේ ඕයි!!

- කමාකරත්වා!ඔය උඩින් දැම්මේ අද කතාවේ නම -


ඔන්න දැන් අර පිස්සො තුන්දෙනා වැටිච්ච තැනින් නැගිටලා බැළුවලු වටපිට.බයිසිකලේ "umbrella powder" ලු.( ඒ කිව්වේ "කුඩේ කුඩු" කියන එකයි හොඳේ )

හප්පපු බයිසිකල්කාරයෝ තුන්දෙනත් නවත්තන්නේ නැතුවම ගිහිල්ල.ඇයි ඉතින් හප්පපු හැප්පිල්ලට කවුද නවත්තල බලන්නේ දෙයියනේ!

මොනවා කරන්නද දැන්.තව බයිසිකලයක් හොයාගන්නව ඇරෙන්න!

ඔන්න තුන්දෙනා පයින් යන්න පටාං ගත්තලු ඉස්සාරහට.දැන් ඉතින් හඳත් හොඳටම පායලා.ඇයි ඉතින් පෝය දවසක්නේ!ඔහොම යනකොට තුන්දෙනාට හොඳටෝම බඩගිනි වුනාලු.ඒත් ඉතින් මහ රෑ මොනවා කියලා කන්නද!

ඔන්න ටිකක් ඉස්සරාට යනකොට තණකොල බිස්සක් උඩ තියෙනවලු ලොකූ , වටකුරු හරියට කේක් එකක් වගේ එකක්!මොකක්ද කියලා කියන්න ඕනි නෑනේ ඉතින්!

ඔව් ඔව් , හිතුවා හරි ......

ඒක ගොම්බෙට්ටක්!

ඔන්න එක පිස්සෙක් කිව්වලු අනිත් දෙන්නට ;

"අඩෝ!මෙන්න පුඩිමක්.කාල බලමුද?" කියලා!!!

අනිත් දෙන්න කිව්වලු "පිස්සුද බං!ඕක පුඩිමක් නෙවෙයි ,ගොම්බෙට්ටක් ඕයි" කියලා.

ඒත් අනිත් එකා විස්වාස කරන්නෙම නෑලු!

"හරි , උබල කියනවනේ මේක ගොම්බෙට්ටක් කියලා,මම කියන්නේ පුඩිමක් කියලා!අපි මෙකෙන් ටිකක් රහ බලලම තීරණය කරමු!" කියලා පොර කිව්වලු.

"උඹට ඕනිනං කාපන් , අපිට පිස්සුද ඔය ජරාව කන්න!" කියල අනිත් උන් දෙන්න කියනවලු.

"පොඩ්ඩක් හිටපන්කෝ!"

කියලා අර පුඩිං පිස්සා ඇඟිල්ලක් ඔබලා ගොම්බෙට්ටෙන් පොඩ්ඩක් අරගෙන කටේ දාගත්තලු!දාගෙන රහ බලලා මූන ටිකක් නරක් කරලා ඔලුව වැනුවලු.

"ම්..ම්....හරියටම කියන්න බෑ....පොඩ්ඩක් හිටපන් තව ටිකක් කාල බලන්න.." කියලා ආයෙමත් අර විදියටම ඇඟිල්ලක් ගොම්බෙට්ටට ගහලා කටේ දාගත්තලු!
අනික් උන් දෙන්න දැන් මූට හොඳටෝම බනිනවලු!

"පිස්සෝ,ඕක ගොම්බෙට්ටක්!පිස්සු කෙලින්නේ නැතුව වරෙන් යන්න..." කිය කියා.

ඒ වුණාට අර පුඩිමා වැඩේ අතෑරියෙම නෑ!පොඩ්ඩ පොඩ්ඩ කනවලු ,මේක පුඩිමක්ද , ගොම්බෙට්ටක්ද කියලා තීරණය කරන්න.

මෙහෙම පොඩ්ඩ පොඩ්ඩ රස බලලා,අන්තිමට මිනිහා මුලු ගොම්බෙට්ටම කාල ඉවරවෙලා , ඔලුව වනලා මෙහෙම කිව්වලු ;

"ඔව් බං!උඹල හරි වගේ.මාත් හිතන්නේ ඒක ගොම්බෙට්ටක් තමයි!"

 


මම යනවා දන්සැල් වඳින්න...අද හැමතැනම ෆන්!

අනේ මන්දා,මිනිස්සු පාරවල්වලට බැහැලා පොරකකා දන්සැල් ගානේ යනවා.හැබැයි පංසල්වලට යන්නේ බොහෝම සුළුදෙනයි![ඔන්න මමනං ගියා හොඳේ!( අම්මා සිල් ගත්තා,එක්කගෙන එන්නයි ගියේ )]

ජාතික ගීයටත් "සල්සා" නටන අපේ උන්දෑලට මේව මොනාද!!

සැ.යු. : ගොම්බෙට්ටක රූපයක් දැම්මේ නැත්තේ අප්‍රසන්න නිසායි.ඒ වෙනුවට මම "සස්සන" හලකෙක් හොයල දැම්ම ඕන්න!

Thursday, June 24, 2010

පිස්සංගේ පිස්සු විකාර - 03

ඔන්න ඉතින් ජබොස් ලියන්නයි හදන්නේ...  කට්ටියම අයින් වෙලා පාර ඉඩ දෙන්න...ඔන්න කශ්ටියම ඉල්ලලා තිබුණු නිසායි බොස් අයියා "හා" කියල තිබුණු නිසායි , අද කතාව මගේ ගානේ ඔන්න...

 පිස්සන් කොටුවෙන් පැනයාම -  2වන කොටස -
- පලමු කොටස කියවන්න මෙතන කොටන්න -

ඔන්න ඉතින් අර පිස්සො තුන්දෙනා ආපහු තාප්පේ හදලා ඉවරවෙනකන්ම ඉඳලා,ඊලඟට ආපු පෝය දවසේ මහ රෑ පිස්සන් කොටුවෙන් සාර්ථකව පැනගත්තලු.( ඇයි ඉතින් මාස ගානක ප්‍රැක්ටිස් එකකුත් තිබුණනේ )

ඔන්න දැන් තුන්දෙනා පයින්ම යනවලු පාර දිගේ.ඔහොම යනකොට කඩයක් අයිනේ නවත්තලා තියෙනවලු අලුත්ම කිරිකිරි බයිසිකලයක්.

ඒ වෙලාවේ බයිසිකලේ අයිතිකාරය කඩේ ඇතුලේ කෑම බීමවලින් සප්පායන් වෙනවා මගේ හිතේ.( එහෙම නොවුණත් එහෙමයි කියලා හිතාගමු,නැත්තන් කතාව ලියන්න බෑනේ )

දැන් ඉතින් තුන්දෙනාටම "පිස්සු" වගේලු!දුවගෙන ගියාලු , නැග්ගලු බයිසිකලේට. 

එකෙක් බයිසිකලේ එලවන සීට් එක උඩලු,අනිත් දෙන්නා බයිසිකලේ හැන්ඩ්ල් එක උඩලු!ඒ කියන්නේ බයිසිකලේ එලවන එකාට පාර පේන්නේ නෑ , ඉතින් එලවන පිස්සට පාර කියන්නේ අර හැන්ඩ්ල් එක උඩ ඉන්න දෙන්නා.ඔන්න දැන් තුන්දෙනා චූන් එකේ යනවලු බයිසිකලේ නැඟලා.

( දැන් අහන්න එපා බයිසිකලේ ස්ටාට් කලේ කොහොමද , දෙන්නෙක් කොහොමද හැන්ඩ්ල් එක උඩ යන්නේ ! වගේ දේවල්. හින්දි ෆිල්ම්වල වෙන දේවල්වල හැටියට මේව මොනවද අනේ! )

[අනික බොස් අයියා මොකට පිස්සෝ තුන්දෙනෙක්ව පිස්සන්කොටුවෙන් පැන්නුවද මන්දා.මෙච්චරකල්  එයාගේ කතාවල පැන්නේ පිස්සෝ දෙන්නයි.මේ පාර අලුත් අයිඩියා පාරක් ඇති බොස් අයියගේ.මිනිහා මොලකාරයනේ ඉතින්.]

ඔන්න ආයෙමත් කතාව :
තව එකදෙයක් කියන්න අමතකවුණා.මේ පිස්සෝ තුන්දෙනා දන්නේ බයිසිකල් ගැන විතරයි.ඒ කියන්නේ පිස්සු හැදුනට පස්සේ වෙන වාහන ගැන අමතකවෙලා.

ඉතින් ඔන්න තුන්දෙනා යනවලු දැන් හැටට හැටේ!යන්නෙත් රෝන්ග් සයිඩ් එකෙන්.ඒ කිව්වේ පාරේ වම්පැත්තෙන් නෙවෙයි,දකුනු පැත්තෙන්ලු.

ඔහොම යනකොට ඔන්න ඈතෙන් එනව පේනවලු ලයිට් එකක්. දැන් ඉතින් මේ පිස්සු අයියන්ඩිලා දන්නේ බයිසිකල් ගැන විතරයිනෙ අනික තනි ලයිට් තියෙන්නේ බයිසිකල් වලනේ,ඔන්න හැන්ඩ්ල් එක උඩ ඉන්න දෙන්නා,බයිසිකලේ එලවන පොරට කිව්වලු

"මචෝ ඈතින් බයිසිකලයක් එනවා.මිනිහා රෝන්ග් සයිඩ් එන්නේ,වම්පැත්තට දාගෙන යමු , නැත්තන් මේ පිස්සා අපිවත් හප්පයි" කියලා.

ඉතින් අපේ ඩ්‍රයිවර පිස්සා බයිසිකලේ සාර්ථකව වම් පැත්තට ගත්තලු.මොහොතකින් අර ඈතින් ආපු බයිසිකලේ සිං... ගාල පහු කරන් ගියාලු මේ තුන්දෙනා යන බයිසිකලේ.




"බලපන් බං ඌටනං අමු පිස්සු.රෝන්ග් සයිඩ් දාගෙන තව හැටට හැටෙත් යනවා!වැඩි දුරක් යන්න කලින් මිනිහ හොඳ පාඩමක් ඉගෙන ගනියි"

කිය කියා හැන්ඩ්ල් එක උඩ ඉන්න උන් දෙන්නා අර ගිය බයිසිකල් කාරයට බනිනවලු.

ඔන්න තව ටිකක් දුර යනකොට තව ලයිට් එකක් එනවලු වම් පැත්තේ ඉස්සරාහින්.
දැන් උඩ ඉන්න දෙන්නා කියනවලු ;

"අනේ බන්!උඹ රෝන්ග් සයිඩ්නේ බන් යන්නේ.ඔන්න තව බයිසිකලයක් එනවා ඉස්සරාහින්,දකුණු පැත්තට ගනින්" කියලා.

ඔන්න ඩ්‍රයිවර් අයියා බයිසිකලේ දකුනට ගත්තලු.අර බයිසිකලෙත් මේ පිස්සු සෙට් එක පහු කරගෙන ගියාලු.

ඔන්න ඊලඟට තමයි සිද්ධිය වෙන්නේ!

දැන් ඔන්න ඈතින් එනවලු ලයිට් දෙකක්!ඔන්න දැන් හැන්ඩ්ල් එකේ ඉන්න දෙන්න කිව්වලු ඩ්‍රයිවරයට ;

"ඔන්න මචෝ බයිසිකල් දෙකක් එනවා ඈතින්.වමට කපන්නත් එපා , දකුණට කපන්නත් එපා.උන් දෙන්නා එකටමයි එන්නේ , ඒ නිසා පාර මැද්දට වෙන්න අල්ලපන්" කියලා!

අපේ ඩ්‍රයිවර පිස්සාත් අර දෙන්න කියපු විදියට පාර මැද්දට වෙන්න බයිසිකලේ අල්ලලා ගියාලු!  

දඩා...ස්!!!!! ගාලා සද්දයක් ආවලු.

අනේ අපේ කතා නායකයෝ තුන්දෙනා උඩී..න් ගිහිල්ලා වැටුනලු පාර අයිනේ තිබුණු කානුවකට.( වෙලාවට තුන්දෙනාටම මුකුත් වුණේ නෑ ඔන්න )

හැප්පෙන්න හේතුව?

ඇවිත් තිබුණේ බයිසිකල් දෙකක් නෙවෙයි , ලොකු බස් එකක්!ඒකේ ඉතින් ලයිට් තියෙන්නේ ඈතින්නෙ!ඒත් ඉතින් මේ පිස්සු අයියන්ඩිලා දන්නේ බයිසිකල් ගැන විතරයිනේ.

ඔන්න දැන් බයිසිකලේ එලෝපු එකා අනිත් උන් දෙන්නට බනිනවලු හෝ ගාලා!

"මොකක්ද බන්!උඹලට හරියට පාරවත් බලල කියන්න බෑනේ!" කිය කියා.

 එතකොට අනිත් දෙන්නගෙන් එකෙක් කියනවලු 

"නෑ බන්!අපේ වරදක් නෙවෙයි.දෙපැත්තෙන් ආපු බයිසිකල් කාරයෝ දෙන්නා මැද්දෙන් ලයිට් නැතුව තව බයිසිකල් කාරයෙක් ඇවිත් බන්!" කියලා.

 

 ඔන්න මම කතාව කිව්වා...ටිකක් දිගවුණා , ඒත් ඉතින් කතාව කොටකරන්න බෑනේ..කියවල බලලා කමෙන්ට් එකක් දාල යන්න අමතක කරන්න එපා හොඳේ!

එහෙනන් මම යනවා...ටටා....

Wednesday, June 23, 2010

පිස්සංගේ පිස්සු විකාර - 02

ඕන්න බොස් ආවා අදත් පිස්සන්ගේ පිස්සු විකාරයක් අරන්. මේක අමු පිස්සුවක්.කියෝලම බලන්නකෝ!!

පිස්සන් කොටුවෙන් පැනයාම

 
ඔන්න පිස්සන් කොටුවක පිස්සො 3 දෙනෙක් උන්නා.මේ තුන්දෙනා හරිම යාළුවෝ!පිස්සු හැදුනෙත් එකටමයි! පිස්සු ජීවිතේ එකටමයි හිටියෙත්.මුන් තුන්දෙනාටම තිබ්බේ අමු බයිසිකල් පිස්සුවක්!

ඔන්න දවසක මේ යාලු පිස්සෝ තුන්දෙනාට හිතුනලු පිස්සන්කොටුවෙන් පැනලා ගිහින් අලුත් බයිසිකලයක් පදින්න!මොකද ඉතින් පිස්සන් කොටුව ඇතුලේ බයිසිකල් තිබුණට එකම බයිසිකලයක්නේ තියෙන්නේ!පිස්සන්කොටු එන්න කලින් පැදපු බයිසිකලේම තමයි පිස්සන්කොටු ඇවිල්ල තාමත් පදින්නේ!අනික ඔය බයිසිකලේ ඉතින් අපිට වගේ වාපේක්ෂව පිස්සුව අඩු අයට පේන්නේ නැති බයිසිකලයක්!

ඔන්න ඉතින් ඔය තීරණය ගත්තට පස්සේ මේ තුන්දෙනා හැමදාම හවස් වරුවේ , පිස්සන්ට සෙල්ලන් කරන්න දෙන වෙලාවෙදි පිස්සන්කොටුවේ පහල කෙරෝලේ කාටවත් පේන්නේ නැති තැනක තාප්පේ ගාවට සෙට් වෙනවලු.

සෙට් වෙලා මොකද දන්නවද කරන්නේ?

තාප්පෙන් පනින්න ප්‍රැක්ටිස් කරනවලු! එකා උඩ එකා නැඟලා තාප්පෙන් එහාට ( ඒ කිව්වේ පිස්සන් කොටුවෙන් එලියට!! ) පනිනවලු මෙහාට පනිනවලු!ඇයි ඉතින් ප්‍රැක්ටිස් නැතුව පනින්න ගිහින් අතක් පයක් කඩාගත්තොත්!මොන දෙයියන්ට කියන්නද?!

 ඔන්න මාසයක් විතර ප්‍රැක්ටිස් කලාම තුන්දෙනාට හොඳටම ප්‍රැක්ටිස් වුනාලු වැඩේ! ඔන්න ඊලඟට ආවේ පැනලා යන්න දිනයක් දාගන්න එක.ඒකට ඒකමතිකවම දාගත්තලු පෝය දවසේ රෑ!ඇයි ඉතින් හොඳටම පාර පේන්න එපැයි පැනලා යන්න! ටෝච් එකක් ගෙනිච්චොත් එහෙම අහුවෙනවනේ සිකුරිටිලට!

ඔන්න යාළුවෝ තුන්දෙනා කතාවෙච්ච විදියටම ඊලඟ පෝය දවසේ ඔන්න හොරෙන් හොරෙන් යනවලු අර ප්‍රැක්ටිස් කරපු තැන තාප්පෙන් පනින්න.එදා දවල් ඉඳලම මහා වැස්සක්ලු තිබ්බේ!

අනේ අනිච්චං!

 අපෙ පිස්සු ෆ්‍රෙන්ඩ්ස්ලා ගිහින් බලනකොට , එයාල ප්‍රැක්ටිස් කරපු තැන තාප්පේ නෑලු!මහ වැස්සට කඩාගෙන වැටිලා!

දැන් ඉතින් පනින්නේ මොකෙන්ද!හරිම වැඩේ,වෙන තැනකින් පනින්නත් බෑ , ප්‍රැක්ටිස් කලේ මෙතනින් පනින්න විතරයිනේ!

ඉතින් තුන්දෙනාගෙම එකඟත්වයෙන් පැනලා යන එක ඊලඟ පෝයට කල් දාගත්තලු!


"පිස්සන් කොටුවෙන් පනින්න හදන් මිතුරු පිස්සන්ගේ අරමුණ සාර්ථක වේද?"

"ඔවුන්ගේ බයිසිකල් සිහිනය සැබෑ වෙයිද?"

ලොමු දැහැගැන්වෙන සිනහාවලින් පිරිපුන් , බඩ අල්ලාගෙන බිම පෙරලි පෙරලී බය විය හැකි , ත්‍රාසජනක වික‍්රමය ගැන හෙට ලියමි!

අදට ඔච්චරයි,මේකෙම ඊලඟ කොටස හෙට දාන්නම්.

මට බඩගිනියි!මම යනවා....ටටා.........